Etiqueta: Destacado portada

Jose Garabatos, secretario da nosa Sociedade, clausurou cunha conferencia a exposición ‘Verne e as xeociencias’

O secretario da Sociedade Jules Verne de Vigo, Jose Garabatos, ofreceu o pasado xoves 12 de marzo unha conferencia titulada «Verne, ciencia e ficción», coa que foi clausurada a exposición «Verne e as xeociencias» que, dende o 19 de febreiro, estivo aberta no Centro Comercial A Laxe, organizada polo Consello Superior de Investigacións Científicas (CSIC) e que contou coa colaboración da nosa asociación cultural.

Garabatos, nunha interesante charla, fixo repaso dalgunhas das máis senlleiras novelas de Jules Verne e puxo en dúbida o carácter anticipador do escritor nantés, ao tempo que foi amosando como moitos dos inventos e adiantos técnicos que aparecen nos seus traballos, de feito xa eran unha realidade no seu propio tempo.

Verne, ávido lector de xornais e revistas científicas e divulgativas na súa época, logrou integrar estes adiantos nas súas novelas, así como a xeografía que avanzaba a grandes pasos na segunda metade do século XX.

A conferencia de Garabatos marcou a clausura da mostra organizada polo Consello Superior de Investigacións Científicas (CSIC), que aproveitou a relación entre a ciencia e o escritor francés para crear unha exposición titulada «Explorar a Terra: unha viaxe con Verne e as xeociencias», que tras a súa estrea en Madrid viaxou ata Vigo para estar aberta ao público no Centro Comercial A Laxe. O noso consocio Ricardo Prego, científico no CSIC, fixo as xestións necesarias para traer esta iniciativa divulgativa á nosa cidade.

A mostra propoñía un percorrido pola obra de JulesVerne para destacar o papel fundamental das xeociencias na comprensión e solución dos grandes desafíos que afronta a Humanidade. O cambio climático, a transición enerxética ou riscos naturais como os tsunamis e as erupcións volcánicas eran algúns dos restos abordados nos nove paneis que compoñían esta mostra, acompañada de vídeos complementarios aos que se podía acceder mediante códigos QR.

Aquí podes consultar os contidos da exposición

A exposición organizada polo CSIC conta coa colaboración da nosa Sociedade Jules Verne de Vigo e estará ata o 12 de marzo no Centro Comercial A Laxe

Jules Verne divulgou nas súas novelas algúns dos grandes desafíos relacionados coas ciencias da Terra que cobran actualidade no mundo actual. Así que o Consello Superior de Investigacións Científicas (CSIC) aproveitou esta relación entre a ciencia e o escritor francés para crear unha exposición titulada «Explorar a Terra: unha viaxe con Verne e as xeociencias», que dende o pasado xoves 19 de febreiro e ata o 12 de marzo de 2026 estará aberta ao público en Vigo no Centro Comercial A Laxe.

A mostra propón un percorrido pola obra de JulesVerne para destacar o papel fundamental das xeociencias na comprensión e solución dos grandes desafíos que afronta a Humanidade. O cambio climático, a transición enerxética ou riscos naturais como os tsunamis e as erupcións volcánicas son algúns dos restos abordados nos nove paneis que compoñen a mostra e nos vídeos complementarios aos que se pode acceder mediante códigos QR.

O investigador Blas Valero, un dos comisarios da mostra, presentou en Vigo unha conferencia inaugural, que contou con ampla presenza de público e que fixo repaso das novelas elixidas para unha auténtica lección de xeociencias, dende as profundidades do noso planeta en «Viaxe ao centro da Terra» ata a exploración oceánica en «20000 leguas baixo dos mares». A conferencia foi presentada polo científico Ricardo Prego, do Instituto de Investigacións Mariñas de Vigo, centro pertencente ao CSIC, e que tamén é socio e membro da xunta directiva da nosa Sociedade.

A exposición conta coa colaboración da nosa Sociedade Jules Verne de Vigo, dende a que queremos agradecer ao CSIC o seu interese por divulgar a ciencia e, ao mesmo tempo, empregar a figura do inmortal novelista cuxas historias seguen a engaiolar ao mundo.