O programa cultural de Televisión Española publica unha entrevista coa SJVV sobre a relación de Verne e Vigo O programa ‘Un país para leerlo’ es un espacio cultural de TVE que divulga a relación entre… Más
Verne para estudantes de Baiona e Pornic
A nosa Sociedade Jules Verne de Vigo organizou unha charla didáctica e un roteiro verniano para o alumnado do CPI Cova Terreña
Estudantes de institutos de Baiona e Pornic participaron nunha charla didáctica e un roteiro verniano organizados pola nosa Sociedade Jules Verne de Vigo (SJVV) como un xeito de trasladar a estreita relación entre o escritor nantés e a ría viguesa. As vilas de Baiona e Pornic (Francia) están irmandadas e fan intercambios de alumnado con estadías nos dous centros educativos e residencia con familias de ambos os dous institutos. Así que este ano 2025 pediron á nosa SJVV dúas actividades que exemplificasen a relación entre elas. Sen dúbida, o personaxe común era Verne, quen non só visitou a ría de Vigo en dúas ocasións, en 1878 e 1884, senón que trouxo aquí ao submarino Nautilus do capitán Nemo para rescatar os tesouros mergullados da batalla de Rande de 1702. Por outra banda, Pornic é un importante porto situado preto de Nantes, a vila natal de Verne, onde por certo unha asociación cultural senlleira construiu unha réplica do ‘Saint Michel II’, o segundo iate que tivo o escritor francés.
Os nosos socios José Garabatos e Julio Ástor ofreceron primeiramente unha charla para alumnado de Primaria sobre os inventos e a tecnoloxía na obra de Verne. Seguidamente, unha semana máis tarde, o alumnado da ESO tanto de Baiona como os visitantes de Pornic puideron realizar en Vigo un roteiro verniano, no que percorrimos a fortaleza do Castro, o monumento aos galións de Rande, a Alameda, o Casco Vello, o Real Club Náutico e o hotel Universal para rematar ante o monumento a Verne no paseo das Avenidas.
Ambas as dúas xornadas foron un novo xeito de reivindicar a relación entre Verne e Vigo, desta volta cun alumnado internacional, tanto de Baiona como da vila de Pornic, na terra natal do autor de «20000 leguas baixo dos mares».
Concerto sobre poemas vernianos
O venres 19 de marzo, levouse a cabo un concerto baseado en obras de xuventude de Jules Verne, con música do seu paisano e amigo Aristide Hignard. Estas obras inclúen Os gavieros, seis Rimas e Melodías e o romance musical Daphne. En total, oito pezas.
Dito concerto tivo lugar no salón de actos da Escola Municipal de Artes e Oficios de Vigo. O salón resultou pequeno para a cantidade de público que respondeu á convocatoria, e o cheo foi absoluto.
Os intérpretes foron os vigueses Nuria Lorenzo, mezzosoprano e Alejo Amoedo, pianista. O piano utilizado é unha peza histórica, un Rönish de 1890 que pertenceu a María Luisa Chevallier, pianista precoz que xa daba concertos aos nove anos de idade en París. Este piano chegou a Vigo coa neta da pianista e está en custodia na EMAO.
O acto foi organizado polo Instituto de Estudos Vigueses. O membro dese Instituto, Antonio Giráldez, encargouse da presentación do concerto e dos intérpretes. Giráldez suliñou que, antes de acadar éxito como novelista, Verne adicouse a escribir poesía e teatro. Os seus poemas, case sempre de amor, foron musicados por Hignard. Verne, aficionado á música, era un pianista afeccionado e gozaba dunha boa voz de tenor. Tamén escribiu el mesmo algunhas partituras.
O capitán Nemo acode puntual á súa cita anual
Conmemoramos o 157 aniversario da entrada do Nautilus na ría de Vigo
O sábado 15 de febreiro celebramos a tradicional lectura do oitavo capítulo da segunda parte da novela «20000 leguas baixo os mares» de Jules Verne. En dito capítulo tivo lugar a entrada na ría do submarino Nautilus capitaneado por Nemo o día 18 de febreiro de 1868.
O acto foi presentado polo presidente da SJVV, Eduardo Rolland e contou coa presenza do portavoz do goberno municipal, Carlos López Font, en representación do concello de Vigo.
A mañá presentouse ventosa pero sen chuvia, polo que a reunión de vernianos puido desenvolverse de xeito moi lucido.
Cómpre salientar a presenza dos amigos da asociación Virazón, encabezados polo seu presidente Antonio Iglesias, e do colectivo poético Desafiando Sombras, que interpretaron fragmentos da lectura en xaponés, alemán, italiano, francés, castelán e galego. Agradecémoslle profundamente a súa colaboración que supón un realce engadido para este evento.
A celebración de este ano 2025 é a primeira do que podemos chamar «ciclo congresual de Vigo», pois, despois do IV Congreso Internacional Verniano delebrado en Cartaxena de Indias, Colombia, en 2024, o próximo será o V Congreso en Vigo no ano 2028.
Máis vídeos aquí: https://photos.google.com/share/AF1QipMZXITm660aT4iCnGr9Mzl2EKRYejzwHDbpyakAC8JpPtKVT9dqprLlSXigD9K8gA?key=ZC1VRXdacm5PS0xsNmhYVk56TUpQWDlCS1N3eDZB
Unha viaxe extraordinaria ao metaverso inmersivo de Verne
O noso socio e intrépido aventureiro cibernético, o profesor @RamonSuarez_, desprazouse a Barcelona para explorar a exposición inmersiva e interactiva JULES VERNE 200, e nos envía esta apaixonante crónica:
Segundo a organización, JULES VERNE 200 é a primeira produción de experiencia inmersiva en gran formato sobre literatura e ciencia, estreada mundialmente en IDEAL Centro de Artes Digitales de Barcelona e que continuará a súa xira mundial hasta 2028 (coincidindo co 200 aniversario do nacimento de Verne).
A experiencia conta con salas expositivas con paneis tradicionais, salas inmersivas 3D de máis de 1.000 m2 de pantalla, experiencias de realidade virtual, intelixencia artificial interactiva, e un innovador metaverso META-VERNE por el que se pode pasear presencialmente por as novelas máis populares de Verne, como “Viaxe ao centro da Terra”, “20 000 leguas baixo dos mares”, “A volta ao mundo en 80 días”, “Robur o conquistador” e “Da Terra á Lúa», entre outras.
O noso intrépido explorador tamén aproveitou para disfrutar das curiosidades Steampunk, literarias e gastronómicas de Barcelona.
Mobilis in mobili
Día de ler a Verne 2025
Como ven sendo habitual. a Sociedad Hispánica Jules Verne convocou o Día de ler a Verne en datas en torno ao 8 de febreiro, cando se cumplen 197 anos do nacemento do autor nantés. Nesta efeméride colabora a Sociedade Jules Verne de Vigo.
Celebráronse actos de lectura por todo o mundo, organizados pola SHJV e polas distintas entidades colaboradoras, amosando que as obras de Verne están ben vivas.
Resumo do ano 2024
| O ano 2024 a Sociedade seguiu a divulgar a obra do autor francés e a súa especial relación coa cidade e a ría de Vigo, con presenza en diversos e relevantes eventos. Velaquí un resumo desas actividades. |
| Día de ler a Verne |
 |
| O ano comezou co Día de Ler a Verne que a Sociedade Hispánica ven celebrando nos últimos anos coa colaboración de diversas entidades entre as que se atopa a SJVV.Este ano, celebrouse un acto especial na Biblioteca Arús de Barcelona, coa participación dos ilustres vernianos e membros da SHJV Pasqual Bernat, Eugeni Pérez e Joaquim Albert. Os dous primeiros son, tamén, membros da Sociedade Jules Verne de Vigo.Por outra banda, no IES Castelao de Vigo tivo lugar unha actividade escolar para celebrar este día, por iniciativa de Sara Alonso, profesora e verniana. Parabéns. |
| Conmemoración da entrada do Nautilus na ría de Vigo |
 |
| Un ano mais, celebramos a entrada do submarino Nautilus na ría de Vigo, ocorrida o 18 de febreiro de 1868 na ficción, segundo a inmortal obra do autor francés ‘20000 leguas baixo dos mares’.O acto desenvolveuse o 17 de febreiro ante o monumento a Jules Verne no paseo das Avenidas de Vigo, coa presenza do concelleiro de Cultura, Gorka Gómez, en representación do Concello de Vigo.Nunha fermosa mañá, deuse lectura ao capítulo ‘A baía de Vigo’ da devandita novela por parte de numerosos vernianos e afeccionados. Á parte dos socios da SJVV, cómpre salientar a presenza de membros da asociación de navegantes Virazón e da asociación Hermérico, así como do colectivo poético Desafiando Sombras. Agradecémoslles a súa colaboración.Nesta edición introducíronse novidades no acto respecto a anos anteriores. Léronse fragmentos en francés, italiano, alemán e xaponés por cortesía dos membros do colectivo Desafiando Sombras.Outra novidade foi a lectura dos parágrafos doutras novelas nas que o autor cita a cidade e a ría. Concretamente, ‘A illa misteriosa’, ‘Mistress Branican’, ‘Marabillosas aventuras de Antifer’ e ‘Aventuras dun neno irlandés’. |
| Roteiro verniano coa EOI de Ferrol |
 |
| Unha trintena de alumnos e alumnas da Escola Oficial de Idiomas de Ferrol desprazáronse o sábado 20 de abril ata Vigo para facer un percorrido verniano polas rúas da nosa cidade, guiados polos membros da nosa Sociedade Julio Ástor e Eduardo Rolland.A ruta comezou ás 11.00 horas na entrada da fortaleza do Castro, un magnífico miradoiro onde os participantes coñeceron a batalla de Rande, o gran combate naval librado en 1702 na ría viguesa, que o propio Jules Verne inmortalizou na súa obra «20.000 leguas baixo dos mares».Seguidamente, os participantes percorreron diversas rúas da cidade de Vigo, polos espazos que visitou Jules Verne durante as súas dúas estadías na urbe olívica, en 1878 e 1884. |
| IV Congreso Internacional Jules Verne en Colombia |
 |
| A Sociedade viguesa participou no IV Congreso Internacional Jules Verne, celebrado en Cartaxena de Indias (Colombia), con oito relatorios, uns traballos de investigación realizados por outros tantos socios e socias da nosa asociación cultural e que tentan aportar novas achegas á historia do escritor nantés e á súa relación coa cidade olívica.Tres socios da SJVV desprazáronse ata Colombia e participaron no Congreso, presentando as súas investigacións ante o plenario. Foron José Garabatos, Nicolás Moragues e Jesús Souza Troncoso. Pola súa banda, outros cinco asociados presentaron as súas comunicacións por videoconferencia: Pasqual Bernat, Gabriel Romero de Ávila, Julio Ástor, Stella Maris González Balbuena e Eduardo Rolland.O IV Congreso Internacional Jules Verne celebrado en Colombia en 2024 sucede aos xa realizados en Barcelona 2013, La Habana 2017 e Palma de Mallorca 2021. O vindeiro congreso mundial será o quinto, que coincidirá co 200 aniversario do nacemento de Jules Verne e terá como a súa sede Vigo.Dende este momento, a Sociedade Jules Verne de Vigo comeza xa a traballar para que o Congreso Mundial Jules Verne de Vigo 2028 sexa un éxito, e que podamos recibir a comunidade verniana mundial cun evento que deixe unnha lembranza imborrábel. |
| Primeira edición en galego de “Un drama nos aires” |
 |
| A Sociedade Jules Verne de Vigo (SJVV) presentou a primeira versión en galego do relato “Un drama nos aires” do escritor nantés, unha obra de 1851 que foi traducida e editada pola propia asociación cultural. A tradución ao galego foi realizada pola filóloga Tamara Aymerich, que pertence á Sociedade Jules Verne de Vigo, e revisada por Gloria Paredes.O acto de presentación pública tivo lugar na Biblioteca da Escola Municipal de Artes e Oficios, o luns 13 de maio.«Un drama nos aires» cunha tirada limitada e afrontada pola propia Sociedade Jules Verne de Vigo xa pode adquirirse tamén na nosa web, ao tempo que, como é tradición, se fixo doazón de exemplares nas bibliotecas públicas da cidade de Vigo para que estean accesibles ao gran público. |
| Conferencia “150 anos de viaxe submarina” |
 |
| Unha viaxe no tempo dende o submarino ‘Nautilus’ do capitán Nemo ata os modernos submarinos que sucan os mares. Organizada pola Asociación Virazón, coa colaboración da nosa Sociedade Jules Verne de Vigo, o 22 de novembro de 2024, tivo lugar no salón de Actos da Autoridade Portuaria viguesa unha conferencia conxunta co Capitán de Corveta José Manuel Piñero Álvarez, vigués, quen foi oficial de navegación e comandante no S-74 Tramontana e, posteriormente, oficial de comunicacións e xefe de operacións no S-73 Mistral, e actualmente, tras realizar o Curso de Estado Maior no Joint Services Command and Staff College do Reino Unido, destinado na Sección de Submarinos do Estado Maior da Armada.Na súa compaña, falou Eduardo Rolland, en calidade de presidente da Sociedade Jules Verne de Vigo.A charla contou cunha grande participación, cun salón de actos totalmente completo. |
| Verne decora o novo aparcadoiro da Laxe |
 |
| O remodelado aparcadoiro da Laxe, a poucos metros da escultura dedicada a Jules Verne fronte ao Porto de Vigo, loce agora unha espectacular decoración dedicada ao escritor nantés e aos protagonistas da novela «20000 leguas baixo dos mares», na que un capítulo titulado «A badía de Vigo» trae ao submarino Nautilus do capitán Nemo ata a ría viguesa para rescatar os tesouros mergullados dos galeóns da batalla de Rande de 1702.Nas fotos realizadas pola nosa socia Judit Nogueiras, podemos ver esta actuación, que é obra do artista urbano vigués Antonio Barbará ‘Powone’, quen atopou en Verne a mellor inspiración para decorar os accesos a este céntrico parking, situado fronte ao edificio do Real Club Náutico de Vigo, enfronte do lugar onde fondeou o iate ‘Saint Michel III’, nas dúas visitas que o novelista fixo á cidade viguesa nos anos 1878 e 1884. |
O ano 2025 será o primeiro do “ciclo congresual” que rematará en 2028 coa celebración en Vigo do V Congreso Internacional organizado en colaboración fraternal entre a Sociedade Hispánica Jules Verne e a Sociedade Jules Verne de Vigo. O camiño será intenso e, agardamos, produtivo. MOBILIS IN MOBILI |
Verne decora o novo parking da Laxe
O artista urbano Antonio Barbará ‘Powone’ enche as súas paredes de motivos dedicados ao capitán Nemo e o Nautilus de ‘20000 leguas’
O remodelado aparcamento da Laxe, a poucos metros da escultura dedicada a Jules Verne fronte ao Porto de Vigo, loce agora unha espectacular decoración dedicada ao escritor nantés e aos protagonistas da novela «20000 leguas baixo dos mares», na que un capítulo titulado «A badía de Vigo» trae ao submarino Nautilus do capitán Nemo ata a ría viguesa para rescatar os tesouros mergullados dos galeóns da batalla de Rande de 1702.
Nas fotos realizadas pola nosa socia Judit Nogueiras, podemos ver esta actuación, que é obra do artista urbano vigués Antonio Barbará ‘Powone’, quen atopou en Verne a mellor inspiración para decorar os accesos a este céntrico parking, situado fronte ao edificio do Real Club Náutico de Vigo, enfronte do lugar onde fondeou o iate ‘Saint Michel III’, nas dúas visitas que o novelista fixo á cidade viguesa nos anos 1878 e 1884.
O propio capitán Nemo está representado nun dos muros, mentres que noutro aparece Jules Verne, fronte a un ollo de boi dende o que se observa a ría de Vigo. Tampouco falta a imaxe do ‘kraken’ que atacou o submarino Nautilus na novela verniana, así como imaxes mariñas diversas, nas que predomina a cor azul.
Powone destaca por ser o responsable da sección de graffiti do festival do Marisquiño, onde na última edición abordou o tema de ‘20.000 leguas baixo dos mares’, para facer homenaxe á estreita relación entre Verne e Vigo, cidade que visitou en dúas ocasións e que fixo protagonista da súa obra. Dende a nosa asociación cultural, a Sociedade Jules Verne de Vigo, dedicada a promocionar a estreita relación entre Verne e a cidade olívica, queremos felicitar a Powone polo seu traballo, nun espazo emblemático, onde tamén a moi poucos metros está dispoñible o visor submarino ‘Nautilus’, que permite contemplar os fondos da ría viguesa.
Conferencia «150 anos de viaxe submarina»
O Capitán de Corveta José Manuel Piñero e o presidente da SJVV, Eduardo Rolland, falaron «Do Nautilus aos submarinos modernos»
Unha viaxe no tempo dende o submarino ‘Nautilus’ do capitán Nemo ata os modernos submarinos que sucan os mares. Organizada pola Asociación Virazón, coa colaboración da nosa Sociedade Jules Verne de Vigo, este venres 22 de novembro de 2024, tivo lugar no salón de Actos da Autoridade Portuaria viguesa unha conferencia conxunta co Capitán de Corveta José Manuel Piñero Álvarez, vigués, quen foi oficial de navegación e comandante no S-74 Tramontana e, posteriormente, oficial de comunicacións e xefe de operacións no S-73 Mistral, e actualmente, tras realizar o Curso de Estado Maior no Joint Services Command and Staff College do Reino Unido, destinado na Sección de Submarinos do Estado Maior da Armada. Na súa compaña, falou Eduardo Rolland, en calidade de presidente da Sociedade Jules Verne de Vigo.
A charla, titulada «150 anos de viaxe submarina», contou cunha grande participación, cun salón de actos totalmente completo, e foi repasando os fitos do submarino Nautilus que ideou Verne na súa novela «20.000 leguas baixo dos mares» e que trouxo á ría viguesa no capítulo titulado «A baía de Vigo», no que os mergulladores do capitán Nemo rescatan os tesouros afundidos cos galeóns na Batalla de Rande de 1702.
A experiencia do capitán Piñero como comandante do submarino S74 Tramontana permitiunos coñecer a experiencia da a bordo destas embarcacións no século XXI, en contraste co Nautilus do capitán Nemo creado pola imaxinación literaria de Verne.
Fronte á imaxinación verniana, o capitán Piñero ilustrou aos asistentes coa actualidade dos submarinos en todo mundo, cos seus grandes fitos tecnolóxicos, que demostraron que o novelista nantés acertou en moitas das súas predicións sobre o futuro destes navíos, aínda que fallou en moitas outras, unhas relativas a vida a bordo, o subministro de osíxeno, a propulsión, a fonte de enerxía ou o equipamento técnico.
Dende a Sociedade Jules Verne de Vigo queremos agradecer á nosa prezada asociación de navegantes Virazón a organización deste acto, no que foi un pracer colaborar e que supuxo unha interesante achega científica e verniana a unha das grandes obras da literatura universal.
Presentamos a primeira edición en galego de «Un drama nos aires»
A Sociedade Jules Verne de Vigo estreou na Biblioteca da EMAO a tradución realizada pola nosa socia Tamara Aymerich
A Sociedade Jules Verne de Vigo (SJVV) presentou a primeira versión en galego do relato “Un drama nos aires” do escritor nantés, unha obra de 1851 que foi traducida e editada pola propia asociación cultural. O acto de presentación pública tivo lugar na Biblioteca da Escola Municipal de Artes e Oficios, o luns 13 de maio.
A tradución ao galego de “Un drama nos aires” foi realizada pola filóloga Tamara Aymerich, que pertence á Sociedade Jules Verne de Vigo, e revisada por Gloria Paredes.
“Un drama nos aires” narra unha peripecia aerostática en Europa a mediados do século XIX. No momento de soltar o seu globo un esforzado aeronauta atópase atacado por un tolo que o abordou nese perigoso momento. Durante a loita e negociación que segue, o tolo fai un resumo dos inicios da aerostática para acabar proclamando a súa intención de morrer nas mesmas circunstancias que os seus máis prezados heroes.
O acto de presentación comezou cunhas palabras do presidente da SJVV, Eduardo Rolland, quen falou da actividade editorial da asociación, que cada ano publica unha obra de Verne na súa versión en galego ou ben un traballo de investigación sobre o universo verniano. Pola súa banda, Jose Garabatos, membro da directiva, explicou os detalles da publicación de «Un drama nos aires» e o significado que este tipo de relatos da primeira etapa do novelista tiveron no conxunto da súa obra. Finalmente, a tradutora, Tamara Aymerich, membro tamén da nosa sociedade, expuso os paralelismos que atopou en «Un drama nos aires» con obras posteriores de Verne como «Cinco semanas en globo» ou «A illa misteriosa».
«Un drama nos aires» cunha tirada limitada e afrontada pola propia Sociedade Jules Verne de Vigo xa pode adquirirse tamén na nosa web, ao tempo que, como é tradición, se fixo doazón de exemplares nas bibliotecas públicas da cidade de Vigo para que estean accesibles ao gran público.
Vigo, no Congreso Internacional Jules Verne en Colombia
Oitoponencias de membros da Sociedade Jules Verne de Vigo foron presentadas no evento mundial en Cartaxena de Indias
A Sociedade Jules Verne de Vigo participou no IV Congreso Internacional Jules Verne, celebrado en Cartaxena de Indias (Colombia), con oito ponencias, uns traballos de investigación realizados por outros tantos socios e socias da nosa asociación cultural e que tentan achegar novas aportacións á historia do escritor nantés e á súa relación coa cidade olívica.
Tres socios da SJVV desprazáronse ata Colombia e participaron no Congreso, presentando as súas investigacións ante o plenario. Foron José Garabatos, Nicolás Moragues e Jesús Souza Troncoso. Pola súa banda, outros cinco asociados presentaron as súas comunicacións por videoconferencia: Pasqual Bernat, Gabriel Romero de Ávila, Julio Ástor, Stella Maris González Balbuena e Eduardo Rolland.
O catedrático da Universidade de Vigo e membro da nosa Sociedade Jules Verne, Jesús Souza Troncoso, presentou a súa ponencia «La fauna del Faro fin del mundo». José Garabatos expuso a súa investigación «Anticipaciones de un pasmarote que se comporta como un ganso». Nicolás Moragues presentou «El Museo Naval de Julio Verne». Pola súa parte, Gabriel Romero de Ávila expuso o seu traballo titulado «Las influencias literarias del joven Verne», mentres que Julio Ástor dictou unha conferencia titulada «Cinco semanas en globo y los exploradores que lo hicieron posible». Pola súa banda, Stella Maris González Balbuena amosou ao plenario os seus esclarecedores traballos sobre a poesía de Jules Verne coa súa ponencia de investigación «Jules Verne, poeta». Pasqual Bernal falou da «Presencia de la botánica y el mundo vegetal en 20KVS». Finalmente, Eduardo Rolland presentou o seu traballo «Jules Verne e Emilia Pardo Bazán», conectando a ambos os dous autores.
Hai que sinalar que a nosa Sociedade Jules Verne de Vigo é unha asociación cultural irmá da Sociedad Hispánica Jules Verne, de tal feito que a meirande parte dos nosos socios e socias pertencen tamén a asociación hispánica. Tamén queremos felicitar de xeito especial á organización dende Colombia e, moi afectuosamente, ao presidente da SHJV, Ariel Pérez, cuxa dedicación é sabiduría é sempre a mellor guía no noso traballo. Asemade, queremos destacar a gran labor feita por Nicolás Moragues, secretario e fundador da SHJV, que en cada cita internacional sempre foi a alma que permitiu o perfecto funcionamento de cada engranaxe da maquinaria congresual.
O IV Congreso Internacional Jules Verne celebrado en Colombia en 2024 sucede aos xa realizados en Barcelona 2012, La Habana 2016 e Palma de Mallorca 2021. O vindeiro congreso mundial será o quinto, que coincidirá co 200 aniversario do nacemento de Jules Verne e terá como a súa sede Vigo.
Dende este momento, a Sociedade Jules Verne de Vigo comeza xa a traballar para que o Congreso Mundial Jules Verne de Vigo 2028 sexa un éxito, e que podamos recibir a comunidade verniana mundial cun evento que deixe unnha lembranza imborrábel.
Sociedade Jules Verne de Vigo 